DAVAO CITY- Sikop sa gipahigayong anti-illegal logging operation sa Tagum City Police Station kauban ang mga personahe sa Philippine Coconut Authority Davao del Norte ang driver ug helper sa usa ka truck human kining na-aktuhan nga nagbyahe sakay ang tabla sa pinutol nga Lubi o mga coco lumber nga walay igong dokumento.
Subay sa gihimong imbestigasyon sa Tagum City Police Investigation and Detective Management Section, nasayran nga ang maong Mitsubishi Fuso Forward truck nga adunay karga nga mga coco lumber ang gimanehoan ni alyas “REN-REN”, residente sa Salvacion, Panabo City kauban ang iyang helper nga giilang si alyas “JERRY”.
Nagsubay sa National Highway Barangay Bincungan Tagum City ang mga nahisgutan ug didto nasayran nga walay igong mga document ang ilang karga rason nga gisikop gilayon kini sa otoridad.
Samtang sa pikas bahin, gikatakdang mupahigayon ang Philippine Coconut Authority Davao del Norte og scaling ug pag-estimate sa kantidad sa nakumpiskang mga kahoy.
Ang mga dinakpan anaa na karon sa Tagum City Police ug mag-atubang sa kasong paglapas sa Coconut Preservation Act.
Samtang ang truck ug karga niining mga coco lumber ang temporaryong anaa sa kustudiya sa kapulisan.
