DAVAO CITY- Pormal nang gi-deklara ang 14 ka mga barangay diri sa dakbayan sa Davao isip drug-cleared.
Kini subay sa gihimong pag-validate sa Philippine Drug Enforcement Agency Regional Office XI, Department of Interior and Local Government (DILG), Police Regional Office XI, Department of Health ug Local Government Unit sa mga dokumentong gisubmitar sa katorse ka mga applicant barangays ning syudad.
Sumala ni Noli Dimaandal, tigpamaba sa PDEA XI, lakip sa mga barangay nga drug cleared mao ang Barangay 36-D sa Poblacion District, Barangay Talomo River sa Calinan District, Barangay Gumalang sa Baguio District, Barangay Alambre ug Tungkalan sa Toril District, Barangay Balengaeng, Biao Escuela, Los Amigos, Manuel Guianga, Matina Biao, New Valencia, Tacunan, Tagakpan ug Talandang sa Tugbok District.
Sa kinatibuk-an, muabot na sa 81 ka mga barangay dinhi sa siyudad ang gideklarang drug cleared diin kahinumduman nga adunay 67 ka mga barangay ang una na sab nga gideklara niadtong nakalabay nga mga bulan.
Gipahigayon ang deliberasyon kagahapong adlawa sa Barangay 36-D Hall, Poblacion diin ang nahisgutang mga barangay ang nakahimo sa pag-comply sa mga required documents alang sa Drug-Cleared Barangay nga gitakda sa Dangerous Drugs Board Regulation Number 3, Series of 2017 ug PDEA Memorandum Circular number 2020-041.
Mitambong atol sa deliberasyon ang mga miyembro sa Regional Barangay Drug Clearing Program Team (RBDCPT), Barangay Officials, mga miyembro sa Barangay Anti-Drug Abuse Council (BADAC) sa 14 ka mga Drug-Cleared Barangays ug uban pang stakeholders sa Davao City.
