DAVAO CITY- Gibutyag ni Davao City Police Office (DCPO) Director PLt. Col. Alberto Lupaz nga nag-una ang theft o kawat sa giilang walo ka mga focus crimes sa dakbayan sa Dabaw.
Sumala pa niini, gikan Hulyo hangtud Setyembre 15 ning kasamtangang tuig, kinatibuk-ang 30 ka mga theft cases ang na-record, halos doble sa 16 ka mga kaso nga gikatala sa susamang panahon niadtong nakalabay nga tuig.
Dugang pa ni Lupaz nga daghan og nasulbad ang DCPO partikular na sa pagsanta sa mga kasong kawat human subling gipatuman ang Oplan R.A.T. Tugis (Robbery/Hold-up, Akyat Bahay and Theft).
Sumala pa niini nga ang subling paglusad sa Oplan Kalinaw ang makatabang usab aron dili na mosaka pa ang mga criminal activity sa nagsingabot nga mga bulan.
Gikan sa kapin 500 individuals nga na profile atol sa launching sa Oplan Kalinaw sa Barangay Centro Agdao niadtong September 16, sumala ni Lupaz nga ang DCPO nakadakop og 8 ka mga wanted persons ug naka-impound og lima ka mga unregistered vehicles.
Samtang plano sa DCPO nga mopahigayon og ikaduhang Oplan Kalinaw Community Outreach Mission sa Barangay 76-A, Bucana ning syudad sa katapusan nga bahin karong bulana.
