DAVAO CITY – Dunay ipatuman nga big time oil price rollback ang mga kompanya sa lana karung adlawng Martes, Setyembre 20, 2022.
Subay sa gipagawas nga abiso sa mga kompanya sa lana, sama sa Shell, Petron, Seaoil, PTT Philippines, Total, Unioil, Petro Gazz ug Phoenix Petroleum mupatuman sila og dakong pagkunhod sa lana nga Php 4.15 matag litro sa diesel ug Php 4.45 matag litro sa kerosene samtang, walay paglihok sa presyo sa gasolina nga epektibo sugod kaganinang alas-6 sa buntag.
Aduna usab pagkunhod sa presyo nga susuma sa kantidad sa diesel ug kerosene ang Caltex sugod kaganinang alas-12:01 sa kadlawon.
Samtang ipatuman sa Cleanfuel ang price adjustment unyang alas 8:01 sa buntag.
Ang ipatuman nga dakong pagkunhod sa presyo sa diesel ug kerosene, taliwala kini sa nagpadayon nga paglihok sa presyo sa pangkalibutan nga merkado.
Sa pikas bahin, gipaklaro sa Land Transportation Franchising and Regulatory Board Davao Region nga dili pa ipatuman ang P1 fare increase sa tibuok Davap Region.
Matud pa ni LTRFB 11 Regional Director Nonito Llanos III, magdepende kini sa mamahimong desisyon sa LTFRB Central Office kung ipatuman ba ang fare increase sa tibuok nasud. Kasamtangang anaa sa dose pesos gihapon ang minimum fare sa matag PUV diri sa dakbayan.
