DAVAO CITY- Padayong gitutukan karon sa lokal nga panggamhanan sa Davao ang isyu mahitungod sa gina-angkon matud pa nga ancestral domain sa Marilog District, Davao City sa mga tribal leaders nga gikan sa North Cotabato.
Kini mismo ang gipanaad ni Davao City Mayor Sebastian “Baste” Duterte diin mikunsulta na ang syudad ngadto sa National Commission on Indigenous Peoples (NCIP-11) kung unsaon kini paghatag og solusyon.
Kahinumduman nga niadtong nakalabay nga mga adlaw, miadto sa Brgy. Baganihan sa Marilog District ang pipila ka mga tribal leaders gikan sa Magpet, North Cotabato aron i-reclaim matud pa ang ilang yuta sa nahisgutang lugar.
Subay niini, hugot nga nakig-alayon ang Public Safety & Security Command Center sa mga tribal leaders sa Marilog aron mahatagan og kasulbaran ang problema mahitungod sa ancestral domain.
Nanawagan na lamang karon si Mayor Duterte ngadto sa mga Indigenous Peoples nga dili ipamaligya ang yutang kabilin niini gumikan mao kini ang nag-unang hinungdan sa mga panagbingkil. Gipahinumdom sab niini nga dili mamahimong mabaligya ang mga luna nga sakop sa ancestral domain.
