DAVAO CITY- Muabot sa kapin 50 ka mga radio stations sa Davao Region ang nasutang iligal nga ga-operate. Kini mismo ang gikumpirma ni Nelson Cañete, Regional Director sa National Telecommunications Commission (NTC) XI.
Nasayran nga wala kini igong mga dokumento samtang ang uban, aplikasyon pa lamang ug dili pa aprubado sa komisyon.
Nanawagan na lamang si Cañete sa mga nagkadaiyang Local Government Units sa rehiyon nga muhimo og lakang batok sa nahisgutang mga istasyon sa radyo nga ilegal nga naga-operate.
Gibutyag sa opisyal nga nagsugod matud pa ang pagdaghan sa mga radio stations sa Davao Region niadtong panahon sa kampanya sa eleksyon gumikan ang uban ang gigamit matud pa sa pipila ka mga politiko alang sa ilang kampanya ug kandidatura.
Dugang niini, nanghangyo ang opisyal ngadto sa mga LGU nga ayha hatagan og business permits ang mga radio stations, kinahanglan usang sayron kung aduna kini sertipikasyon gikan sa National Telecommunications Commission.
