DAVAO CITY – Anaa sa 4,890 ka mga Dabawenyos ang makabenepisyo gikan sa P48.9 million Livelihood Assistance Grant (LAG) alang sa last batch sa payout nga gipangunahan sa Department of Social Welfare and Development (DSWD) pinaagi sa City Social Welfare Development Office (CSWDO).
Ang maong pay-out ang gisugdan kagahapong adlawa. Gikuha ang maong ayuda gikan sa Office of the President ug pondo sa DSWD diin nahimo kining posible pinaagi sa Republic Act 11469 o ang Bayanihan to Heal as One Act of 2020 ilalom sa administrasyon ni kanhi Pangulong Rodrigo Duterte.
Gipahigayon karong adlawa sa People’s Park ang ceremonial payout. Sumala ni Astred Cajes, focal person sa CSWDO livelihood program, anaa sa 390 ka mga panimalay ang makabenepisyo sa LAG alang sa first district; 3,000 sab ang makabenepisyo sa second district ug 1,500 alang sa third district. Makadawat ang matag benepisyaryong pamilya og anaa sa P10,000 nga cash grant.
Gihimong basehan sa CSWDO alang sa ilang master list ang listahan nga gi-submit sa mga barangay social workers diin gihatagan gayud og prayoridad ang mga indigent nga pamilya kinsa labing naapektohan ang panginabuhian gumikan sa COVID-19 pandemic.
Gipaklaro usab sa opisyal nga bugtong ang first district lamang ang adunay gamay nga beneficiaries karong tuiga gumikan ang maong distrito usab ang adunay pinakadaghang benepisyaryo niadtong 2021.
Dugang pa sab ni Cajes nga ang 2022 allocation ang gitagana alang lamang unta sa second ug third districts apan adunay pipila ka mga biktima sa baha nga nanimuyo kilid sa sapa sa Maa, Talomo, ug Bankerohan niadtong nakalabay nga tuig ug uban pang mga biktima sa kalamidad ang wala nakadawat og assistance rason nga gilakip sila sa listahan karong tuiga.
