DAVAO CITY – Nagpadayon ang pagpanghatag sa Department of Social Welfare and Development Field Office Office XI sa AICS Educational Assistance sa Regional Office ug sa mga provincial satellite offices karong adlawa, Setyembre 3, ikatulong Sabado sa pay-out sa maong tabang pinansyal alang sa mga indigent students.
Subay niini, sa Regional Office, Davao City, Davao Oriental, ug Davao del Norte satellite offices, nagpadayon pa gihapon ang pag asses sa mga kliyenteng nakadawat na og mensahe gikan sa opisyal nga numero nga gigamit sa buhatan.
Samtang sa Davao Occidental, sayo nga gisugdan kaganihang buntag ang pagpanghatag og educational assistance. Sa Davao del Sur, gipasabot sa mga support staff sa mga kliyente ang mahitungod sa gipatumang “NO WALK-IN POLICY”. Samtang sa Davao de Oro, gilayon sab nga nanguli ang mga walk-in clients human nga subling gi-anunsyo ang mahitungod sa suspension sa drop box.
Sa pikas bahin, nagpahimangno karon ang buhatan ngadto sa tanang aplikante nga nakadawat na og opisyal nga text message gikan sa duha ka opisyal nga mga numero alang sa text blasts nga DILI MU-REPLY O MANAWAG tungod NO-REPLY kini nga mekanismo.
Gipasabot sa buhatan nga ang tawag o replies sa mga aplikante ang makapalangan sa text blast ug gina-interrupt niini ang padayong pagsend sa mga text messages sa ubang aplikante. Ang opisyal nga mga numero nga ginagamit sa text blast ang adunay last 4 digits nga 6192 ug 5857.
