DAVAO CITY – Subling gipangandaman na sa personahe sa Davao City Police Office kun DCPO kauban ang Police Regional Office kun PRO XI, ug ang tibuok Safety and Security cluster sa Dakbayan sa Dabaw ang pagpakatag sa mga kapulisan arun sa pag siguro nga hapsay ang dagan sa mga aktibidad ug walay hulga sa seguridad atol sa kasaulogan sa ika-37 nga Kadayawan Festival sa Davao ilabi na ang mga dagkong event ang ipahigayon na ugma, adlaw nga Sabado, Agosto 20, nga mao ang Indak-Indak sa Kadalanan ug ang sa Dominggo, Agosto 21, ang Pamulak sa Kadayawan.
Atol sa pakighinabi sa Bombo Radyo Davao kang Police Major Maria Teresita Gaspan, tigpamaba sa DCPO XI, gibutyag niini nga ang security measures hugot gipatuman gikan sa outer layer paingon sa inner layer sa security blanket. Ang hugot nga pagpatuman sa seguridad ipatuman sa kapin 5,000 ka mga security personnel nga gipakatag alang sa security coverage sa mga activity areas.
Dugang pa, walay hulga sa seguridad nga natala ang ahensiya apan wala kini nagpakumpiyansa. Pirming anaa sa high alert level ang security measures niini pinaagi sa pagpatuman og checkpoints sulod ug gawas sa Dakbayan sa Dabaw. Apil sab sa security coverage niini ang pag deploy ug mga personahe sa mga gambalay sa kagamhanan ug uban pang imprastruktura.
