DAVAO CITY – Hugot ang panawagan karon sa Davao City Police Office (DCPO) ngadto sa tanang katawhang Dabawenyo nga mahimong responsable sa tanang ipadayag niini sa social media aron dili makadaut sa imahe ug reputasyon sa ubang institusyon ug tawo.
Kahinumduman nga nag-viral sa social media ang usa ka Facebook post gikan sa usa ka netizen diin aduna matud pay sakop sa kapulisan nga gapangayo og baligya sa street food vendor sa may Cabaguio Avenue ning dakbayan.
Subay niini, nagpagawas na sab og pahayag ang DCPO mahitungod sa maong isyu ug subay sa ilang pakig-koordina sa tag-iya sa maong isawan, nasayran nga si Police Corporral Lad, personahe sa Mobile Patrol Unit, ang nagdumala niini.
Sa gihimong imbestigasyon sa DCPO, nasayran nga ayha paman mi-abot ang netizen sa nahisgutang lugar, una na matud pang mi-agi ang mobile patrol alang sa ilang order. Igo lamang mibalik ang mobile patrol human sa ilang pagpatrolya ug gipick-up ang order ilang order.
Nanawagan na lamang karon si Police Col. Alberto Lupaz, hepe sa DCPO, nga angayan gayud nga mahimong responsable ang bisan si kinsa man sa pag-post sa social media aron dili kini makadaot sa reputasyon sa ubang institusyon o dili ba kaha tawo.
