DAVAO CITY – Gipanaad sa lokal nga panggamhanan sa Davao nga muhatag kini og hinabang alang sa mga street vendors sa Toril District human gisuspinde sa LGU ang ilang operasyon samtang nagpadayon pa ang imbistigasyon kalabot sa nahitabong diarrhea outbreak sa maong dapit.
Matud kang City Social Welfare and Development Office Chief, Atty. Marlisa Gallo, kasamtangan sila nga gahimo og masterlist sa mga apektadong mga street food vendors alang sa ilang assistance samtang wala pay kasiguradohan kanusa makabalik sila sa pagpaninda.
Apan gikanayon niini nga una na silang nang-apud-apod og mga food packs ngadto sa mga unang na-identify nga mga vendor.
Ning kasamtangan, wala pay eksaktong ihap ang CSWDO sa mga apektadong street vendors.
Apan, gilauman niini nga muabot sa gatusan ang mahimong apektado tungod tanang lugar sa Toril District ang apektado sa suspensyon sa street food stalls.
Kagahapon sab, nagpahigayon na og food handling seminar ang City Health Office sa Tril Gym alang sa mga apektadong vendor.
Una nang gikanayon ni Dr. Ashley Lopez, City Health Office head, nga usa kini sa mga prayoridad sa ilang ahensya samtang wala pa nasuta ang hinungdan sa diarrhea outbreak diin muabot na sa sobra 200 ang natala nga apektado gikan sa 21 ka mga barangay.
Sa kasamtangan, ginapaabot karon sa CHO ang resulta sa testing sa unang batch sa food samples nga ilang gisumite ngadto sa Southern Philippines Medical Center aron masuta kung kini ang nahimong rason sa diarrhea outbreak sa Toril District.
Via || Hana Rallos
