DAVAO CITY – Nagpahinumdum karon ang City Government of Davao sa publiko ilabi na sa tanang residente sa mga barangay sa Toril District ning syudad nga apektado sa Diarrhea Outbreak nga samtang ginapaabot pa ang resulta sa mga gipahigayong tests, mas maayo nga sundon ug buhaton kining maong mga butang.
Una, likayan usa ang pag-inom o paggamit og tap water o tubig nga gikan sa gripo alang sa pag-andam og pagkaon kung wala kini gipabukalan hangtud sa 100 degrees.
Gitambagan usab ang mga residente nga ipadaplin usa ang tubig sulod sa napulo ka minuto human sa pagbukal aron masiguro nga sterilized kini.
Ikaduha, kung mamahimo, gamit usa og purified o bottled water isip pangkonsumo. Ikatulo, kanunayon ang paghugas og kamot gamit ang sabon ug tubig.
Gawas niini, gipasalig sab sa Davao LGU nga muhatag og assistance ngadto sa mga apektadong pasyente ingon man sa pamilya sa namatay nga 10 anyos nga batang lalaki gumikan sa diarrhea.
Dugang pa niini, ang Incident Command Center sa Toril B RHU nga nahimutang atubangan sa Magsaysay Elementary School ang abli 24/7 alang sa pag-cater sa panginahanglanon sa mga residente nga nakasinati og sintomas sa diarrhea ug uban pang mga concern. Mamahimo nga tawagan ang numerong 09567565571.
BY BOMBO ALLIANE SILAO
