DAVAO CITY – Wala nay makapugong alang sa katukuran sa Samal Island-Davao City Connector Project sa Department of Public Works and Highways (DPWH) kini human nga gipahigayon na kagahapong adlawa ang launching ceremony sa nahisgutang proyekto. Ang aktibidad ang gipahigayon sa Department of Foreign Affairs (DFA) Main Office sa Roxas Boulevard, Pasay City.
Dakong kalipay nga gibalita ni DPWH Secretary Manuel M. Bonoan ang maong development sa proyekto sa tanang taga rehiyon unse diin una nang gikanayon nga toll-free ang maong tulay ug adunay kini upat ka lanes.
Nasayran nga gumikan sa pagatukurong imprastraktura, mamahimo na lamang nga lima ka minuto ang byahe gikan Davao City paingon sa Island Garden City ug vice versa.
Gihimo ang unveiling sa scale model sa 3.98 kilometers Samal Island-Davao City Connector project atol sa pagbisita ni Chinese State Councilor ug Foreign Minister Wang Yi.
Anaa usab sa launching ceremony sila Ambassador Huang Xilian of the People’s Republic of China in the Republic of the Philippines, DFA Secretary Enrique A. Manalo, ug Undersecretary Emil K. Sadain.
Nagkantidad og ₱23.039-billion ang maong proyekto diin target nga sugdan ang pagtukod sa maong tulay karong tuiga ug laumang matapos sa 2027.
By Bombo Allianne Silao
