DAVAO CITY – Naglusad ug breadfruit propagation training ang Department of Science and Technology XI, diin nagapud-apud ang ahensya pinaagi sa Provincial Science and Technology Center sa Davao Occidental og mga seedling sa breadfruit.
Anaa sa dul-ang 50 ka mga breadfruit seedlings ang nadawat sa katilingban sa Barangay Manuel Peralta, Malita, Davao Occidental samtang 30 ka mga kabalayan sab ang nakadawat alang sa pagahimoong training sa pagpadako niini.
Pagadumalaan sa Green Landscape Care and Maintenance Services trainer nga si Dino M. Gulane ang maong training diin iyang gihatagan ug pagtagad ang mga benepisyong makuha sa maong tanom.
Ang breadfruit o mas ilado sa tawag nga kamansi, usa ka tanom nga gikan sa pamilya sa langka ug mulberry. Taas kini sa protina, minerales sama sa amino acid ug bitamina.
Taas sab kini ug fiber content nga nagapamenos sa glucose absorption ug nagapamentenar kini ug blood pressure. Maayo sab kini itanom tungod pwede kini makonsumo sa panahon sa emerhesiya ug kalamidad.
Ang pag-apud-apod sa mga semilya ug pagbansay sa pagpasanay kabahin sa mga interbensyon aron mapalig-on ang pagkaandam sa komunidad sa mga peligro ubos sa DOST’s Community Empowerment through Science and Technology (CEST) flagship program.
By Bombo LJ Florendo
