DAVAO CITY – Magpahigayon ang City Social Welfare and Development Office ug mga kalihokan sa tibuok syudad, kini alang sa Children’s Fun Day Celebration alang sa mga napasagdang kabatan-onan gikan Hulyo 11 hangtud 20 ning tuig kasamtangan.
Sumala kang CSWDO Focal Person for Pre-School Children Concerns Division Ariel Aguilar, tumong sa kasaulogan nga masiguro nga ang mga bata, makapahimulos sa ilang mga katungod bisan unsa pa ang ilang kahimtang, ug makamugna ug makalingaw nga mga handumanan samtang gapakita sa ilang mga talento ug kahanas pinaagi sa pagbaton ug himsog nga kompetisyon sa ilang mga kaedad.
Ipailawom sa limited face-to-face ang mga kalihukan human sa pagkahunong niini panahon sa pandemya.
Makasalmot sa pagsaulog karung tuiga ang mga children at risk, Children-in-Conflict with the Law (CICL), ug mga batang biktima sa pagpangabuso.
Giatasan na ang mga district offices sa syudad sa pag-pili sa mga musalmot sa mga kalihukan.
Aduna sab ipahigayon nga mga kumpetisyon sama sa Larong Pinoy nga ipahigayon sa matag distrito, ug ang city wide nga Sabayang Bigkas competition diin i-perform ang orihinal nga piyesa ilawom sa tema nga “Sa Pagbangon sa Pandemya, Kabataan may Magagawa Ka.”
Walo hangtud napulo ka mga bata ang mag-recite niini ug isubmit ang entry pinaagi sa usa ka video hangtud Hulyo 18. Mahitabo karung Hulyo 22 ang anunsyo sa mga mananaog.
Makit-an sa City Social Welfare and Development Office Facebook Page ang kinatibuk-ang mga detalye.
Ang Children’s Fun Day diri sa dakbayan, ginapahigayon matag Hulyo ilawom sa Proclamation NO. 35 ni kanhi mayor ug pangulong Rodrigo Duterte.
by Bombo LJ Florendo
