DAVAO CITY – Gilugwayan sa Educational Benefit System Unit (EBSU) sa office of the City Mayor ang submission sa mga requirements alang sa scholarship programs sa dakbayan.
Tumong niini nga maatiman ang mga estudyante gikan sa mga public schools kansa mga grado ang ipagawas sa ika-duhang semana pa sa bulan sa Hulyo.
Ang mga estudyante nga nag-apply alang sa scholarship programs sa lokal nga kagamhanan sa dakbayan sa Dabaw ang adunay hangtud July 15, 2022 aron pag-submitar sa ilang mga scholarship requirements.
Kini ang gipahibalo ni EBSU Technical Assistant Emilio Domingo Jr. human makadawat ug pagtugot ang iyang buhatan gikan kang outgoing mayor Inday Sara Duterte.
Gikanayon ni Domingo nga ang mga estudyante o mga ginikanan ang mamahimong maka-submit sa ilang scholaship requirements sa designated area atubangan sa City Planning and Development Office.
Gikanayon usab niini nga aduna pay kapin 200 slots – 175 slots alang sa STEP, 15 slots sa Medical School, ug 20 slots sa Law School.
Dili lamang sumala pa mabalaka ang mga dili maka-avail karong panahona gumikan kay aduna pay dugang mga slots ang paga-abrihan inig human sa renewal sa scholarship.
Bawion sumala pa ang slot sa mga scholars nga mapakyas sa pagpa-renew.
Hangtud niadtong June 22, 2022, kapin sa 700 ka mga aplikante sa STEP, 20 sa Medical School, ug 20 sa Law School ang nag submit na sa ilang documentary requirements alang sa application.
Dugang pa ni Domingo nga tumong nila nga mahimong pinal ang listahan sa 2,000 qualified new and old scholars ayha magsugod ang school year 2022-2023.
Via || Angie Chagas
