DAVAO CITY – Gikatakdang ipahigayon ang ground breaking ceremony alang sa dugay nang gikahinamang Davao-Samal Island Bridge project.
Kini mismo ang gikumpirma sa Department of Public Works and Highways (DPWH) diin ipahigayon ang ground breaking sunod bulan human nga naaprubahan niadtong Hunyo 13 ang loan agreement tali sa Pilipinas ug China nga nagkantidad og $350 million o tugbang sa P18.67 billion.
Gibutyag ni DPWH Undersecretary Emil K. Sadain nga gi-schedule na sa panggamhanan ang groundbreaking sa 3.98-kilometer project sa bulan Hulyo.
Nasayran nga ang tibouk nga proyekto ang nagkantidad og P19.321-billion diin dakong pondo ang naggikan sa Chinese loan.
Gawas sa groundbreaking nga gikatakdang himoon sunod bulan, lauman usab nga magsugod ang pagtukod sa maong proyekto sulod niining tuiga.
Gikanayon sab ni Sadain nga ang design ug build contract ang adunay gidugayon nga saisenta ka bulan.
Sumala sa DPWH, makahatag kini og ease of access sa mga tourism activities sa Samal, mapalambo pa ang access sa komunidad ngadto sa pagpanarbaho, edukasyon ug uban pang social services ug alternative routes atol sa panahon sa emerhensya ug kalamidad.
Gawas niini, ang maong proyekto ang makahatag sab og resilient ug reliable nga transportation link tali sa Metro Davao ug Samal Island ingon man mapalambo pa niini ang ekonomiya sulod sa syudad ug gawas mismo sa rehiyon sa Davao.
Ang katukuran sa toll-free four-lane bridge – nga adunay duha ka lane matag direksyon – ang makahimo sa pagserbisyo sa bayntesinko mil ka mga sakyanan matag adlaw tali Davao City ug Samal.
Ang pagtukod usab sa maong proyekto ang ginalantaw nga makamugna og liboan ka mga trabaho diin dakong kontribusyon kini alang sa pagrekober sa ekonomiya sa usa ka lugar.
