DAVAO CITY – Padayon pa ang ginahimong pagtuki sa kapulisan sa Mawab Davao de Oro sa posibleng motibo sa pagpusil-patay sa usa ka Barangay Kapitan sa Barangay Kinuban, Maco Davao de Oro kansa gipusil niadtong adlaw nga Lunes, bandang alas sais sa buntag sa Barangay Andili, Mawab sa nahisgutang probinsya.
Giila ang maong kapitan nga si Elizalde Malcampo, hamtong ang pangidaron.
Subay sa gihimong imbestigasyon sa Mawab Municipal Police Station (MPS), nasayran nga igo lamang nagmaneho ang biktima sa iyang motorsiklo gumikan gihatud niini ang iyang apo paingon sa Andili Elementary School.
Wala matud pa namatikdan sa biktima nga aduna na diay nagsunod ka niya nga duha ka indibidwal nga sakay sa usa ka motorsiklo nga walay plate number ug didto na kini gi-atngan sa dihang pabalik na ang biktima gikan sa iyang paghatud sa iyang apo sa skwelahan.
Hustisya karon ang singgit sa pamilya, kabanay ingon man kabarangay sa kamatayon sa maong kapitan.
Sa pikas bahin, nagpadayon pa ang imbestigasyon sa kapulisan diin daghang anggulo ang ginasubay karon mahitungod sa pagpatay sa nahisgutang kapitan.
