DAVAO CITY – Magpadayon lamang gihapon ang mga big-ticket projects sa dakbayan sa Dabaw nga kasamtangang under development bisan pa man og dili na mayor sa dakbayan sa Dabaw si Vice President Inday Sara Duterte.
Kini ang gilangkuban sa P74-billion High Priority Bus System (HPBS) project ug ang plano nga P2.5-billion Waste-to-Energy (WTE) facility.
Gipasalig ni Mayor Inday Sara nga iduso lamang gihapon niini ang pagpadayon ug ang kahumanan sa mga dagkong proyekto sa dakbayan ilalom sa incoming Marcos administration.
Gibutyag sa bise presidente nga mihimo na siya og pasi-unang mga lakang aron masiguro nga magpadayon ang nahisgutang mga proyekto pinaagi sa pagpagawas og direktiba kang Assistant City Administrator Atty. Tristan Dwight Domingo, project head sa HPBS ug WTE.
Ang HPBS project ang nakakuha og pondo gikan sa Asian Development Bank ug kasamtangan nga naa sa contracts-bidding phase.
Tumong sa proyekto nga makahatag og mas limpyo ug mas convenient nga sistema sa transportasyon sa dakbayan sa Dabaw.
Samtang, nakapalit na usab ang syudad og yuta sa Biao Escuela sa Tugbok District alang sa WTE facility site.
Ang WTE project ang gi-plano pinagi sa koordinasyon sa Davao City ug sa sister city niini nga Kitakyushu, Japan.
Ang nahisgutang proyekto ang tubag sa lokal nga kagamhanan sa waste management problem gumikan kay hapit na mapuno ang landfill sa syudad.
Labaw sa tanan, naglaum si VP Inday Sara nga madayon na ang pagtukod sa P19 billion Davao-Samal bridge sulod sa 3 – 4 ka tuig.
Nagpasalamat kini sa administrasyon ni Pangulong Rodrigo Duterte gumikan sa pagpasiugda sa maong proyekto nga gipondohan pinaagi sa People’s Republic of China.
