DAVAO CITY – Dili pa makompirma karon sa lokal nga kagamhanan kung nataptan ba sa chikungunya virus ang pipila ka mga residente sa duha ka mga barangay sa dakbaayn sa dabaw.
Sa kasamtangan, gitutukan sa Tropical Disease Prevention and control unit sa city health office ang mga barangay Panacan ug barangay Ilang ning syudad human makita ang mga timailhan ug mga simtomas sa chikungunya, apan padayon pa nila nga ginakumpirma kung kaso ba gayud kini sa chikungunya.
Sumala pa ni Pest Control Worker II Melodina Babante, dili lamang angayang magmatngon ang katawhan labot sa mga lamok nga nagdala ug dengue virus gumikan kay posibling nagbaton usab kini sa chikungunya virus. Dugang pa ni Babante nga nakasinati na kaniadto ug outbreak sa chikungunya ang Barangay Ilang.
Kini ang hinungdan nganong ginahimo karon ang confirmatory tests aron masuta ang mga bag-ong simtomas nga nasinatian sa barangay, lakip na Panacan aron tukmang masulbad ang problema.
Gipamugos usab ni Babante ang kamahinugndanon alang sa mga Dabawenyos nga tumanon ang 4-S – o ang search and destroy mosquito-breeding sites, ipatuman ang self-protection pinaagi sa pagsul-ob ug long-sleeved shirts ug pantalon ug paggamit matag adlaw ug mosquito repellent, pagkonsulta ug sayo sa doktor.
