DAVAO CITY- Gilauman nga mas modako pa ang mamahimonng kitaon sa lokal nga kagamhanan gikan sa Roxas Night Market ning dakbayan sa dabaw. Subay sa labing ulahi nga record sa City economic enterprise (CEE) halos usaka milyon ka pesos ang nahimong income sukad nga subling gi-abrihan ang roxas night market niadtong bulan sa Marso niining tuiga.
Gikanayon ni CEE operations assistant Derreck Cainglet Jr. kinatibuk-ang P1,054,390 ang nakolekta sa syudad gikan sa rental payment sa 258 vendors sa nahisgutang night market.
Ang 258 ka mga vendors o stalls ang gibahin-bahin ngadto sa four sections nga gilangkuban sa food section, accessories, ready-to-wear (RTW), ug massage. Sa nahisgutang kantidad, labing dako nga kita ang naggikan sa food section nga moabot sa P348,900 ang nakolekta gikan sa 58 ka mga vendors.
Gisundan kini sa RTW section – P311,290 gikan sa 65 vendors, ug P306,460 gikan sa 65 vendors sa mga accessories. Susamang adunay monthly due ang RTW ug ang accessories section nga P2,170 o P70 matag adlaw, samtang ang mga food vendors ang mobayad ug P3,100 matag buhlan o P100 matag adlaw.
Samtang ang massage section ang adunay binulan nga abang nga P620 o P20 matag adlaw.
Matag 3 ka bulan, gina reshuffle ang mga vendors sa roxas night market aron masiguro nga ang tanang mga vendors nga buot mag-operate ang mahatagan ug tsansa.
