DAVAO CITY – Arun nga daghanan ang ma-agni nga magpabakuna, laraw karun sa lokal nga kagamhanan nga manghatag ug usa ka kilo nga bugas alang sa mga Dabawenyos nga mo-avail sa booster dose.
Sumala pa kang Dr. Michelle Schlosser, tigpamaba sa COVID-19 Task Force, ihatag ang usa ka kilo nga bugas sa bisan asa man nga operational vaccination hubs sa siyudad nga nagatanyag ug boosters.
Nasayran nga una ng gisugdan ang nahisgutan nga lakang kaniadtong Abril 26 apan ang libre nga bugas kutob lamang sa mahurot ang supply.
Gi-angkon ni Schlosser nga nagpabilin nga ubos ang booster vaccination drive sa siyudad. Sa milabay nga Mayo 6, anaa sa 252,267 o 19.24 percent sa 1,311,008 fully immunized nga mga indibidwal sa dakbayan ang nakadawat sa ilang unang booster jabs.
Gikan sa 249,360 nga nakadawat sa ilang first boosters sukad Abril 29, bugtong 2,907 lamang ang nadugang sa ihap paglabay sa usa ka semana.
Sa 252,267 nga nakakuha sa ilang first booster shot, at least 734 o 0.29 percent ang nakadawat sa ilang second booster dose sa milabay nga May 6.
Gawas sa immunocompromised individuals nga mamahimong maka-avail sa second booster dose, nagatanyag sab ang siyudad sa tanan nga A1, A2, ug A3 priority groups. Ang mga Medical frontliners (A1), senior citizens (A2), ug hamtong nga adunay comorbidities (A3) ang mamahimong kabahin sa ilang second booster shots at least tulo ka bulan sukad nga nakadawat sa first booster dose.
Gani naka-set up karon ang business processing outsource (BPO) workers sa People’s Park ug sa public utility drivers sa Crocodile Park.
Abli sumala pa ang duruha ka mga parks sugod Lunes hangtud Sabado diin naga-cater kini ug 12 anyos pataas kinsa nanginahanglan ug primary ug booster doses.
Angayan sab sumala pa nga pabakunahan na sa mga ginikanan ang ilang anak nga 5 hangtud 11 anyos ilabi na nga gikatakda na sab ang pagsugod sa face-to-face classes sa pipila ka mga tulonghaan sanglit daghanang mga estudyante sab ang nagpabilin karun nga dili pa bakunado.
Target karun sa siyudad ang 242,209 vaccinees sa 5 to 11 age group apan bugtong 16,846 o 6.96 percent lamang ang nakadawat ug unang dose samtang 13,692 o 5.65 percent ang nakadawat ug second jabs.
