DAVAO CITY – Karun pa lang nagpasalamat na si Vice presidential frontrunner Sara Duterte, sa tanan nga mga Filipino nga midawat ug mihatag kaniya ug suporta.
Sa iyang gipagula nga mensahe, gipasalamatan niini ang tanan nga mga supporters nga mipaluyo sab sa iyang desisyon nga mukandidato sa mas taas nga posisyon.
Bisan nga nagpabilin siya nga nag-una uban ang kapin 30 milyones nga mga boto, gikanayon ni Mayor Inday nga kinahanglan nga bantayan pa gihapon ang boto hangtud sa adlaw sa proklamasyon.
Gitataw sab niini n ga ang UniTeam nga magsilbi nga anchor arun nga magkahiusa ang nasud gikan sa pagbahin-bahin.
Kahinumduman nga anaa na sa 97.14 percent sa election returns ang na-transmit na karun sa Commission on Elections (Comelec).
Dungan sa nagkaduol nga pagkab-ot niya sa vice presidency, nanawagan kini sa publiko nga magkahiusa aron nga maka-recover sa epekto sa pandemiya nga grabeng nakaapekto sa ekonomiya.
Kahinumduman nga anaa karon sa kaulohan ni Mayor Inday arun nga personal nga pasalamatan ang mga naglangkub sa UniTeam slate, headquarters employees ug staff, ingon man volunteer support groups.
