DAVAO CITY – Dungan sa nagsingabot nga eleksiyon karung Mayo 9, 2022 ug sa nagpadayon nga bahad sa Covid-19 pandemic, gi-awhag pa gihapon gikan sa Department of Interior and Local Government-Davao Region (DILG-Davao) ang publiko nga moboto.
Sumala pa kang DILG-Davao Director Alex Roldan, dili sumala pa mamahimong isakripisyo na lamang ang democratic process gumikan lamang sa kahadlok sa Covid-19. Sa higayon nga mubati ug kahadlok ug dili moboto, mamahimong lisud sumala pa ang kaugmaon sa nasud.
Padayon sab ang panawagan sa opisyal ngadto sa mga botante nga mutamod sa minimum health protocols sulod sa polling vicinity.
Gi-awhag sab niini ang publiko nga ipadayon ang paghatag ug suporta sa kasamtangang administrasyon ug sa mga programa nga gipatuman niini pinaagi sa Duterte Legacy Caravan.
Kahinumduman nga ang nahisgutan nga caravan gisalmutan sa 27 government agencies nga gilangkuban sa regional, city offices, ug attached agencies sa Philippine National Police, Department of Social Welfare and Development, Philippine Drug Enforcement Agency, ug Department of Interior and Local Government.
Laraw sab sumala pa sa Caravan nga ipahibalo ngadto sa publiko ang mga programa nga gipatuman karun sa gobyerno ingon man mga polisiya ug pagpaningkamut arun lamang adunay mabati nga kabag-ohan sa nasud.
