DAVAO CITY – Gikalipay sa mga mipaluyo sa Organic Farmers’ Market gumikan kay nakabalik na sila sa ilang operasyon human ang duruha ka tuig nga suspensiyon gumikan sa epekto sa Covid-19 pandemic.
Kahinumduman nga nahimutang ang Organic Farmers’ Market sa Rizal Park ning dakbayan diin nagatanyag sila ug mga organic nga gulay, ornamental plants, bulak ug artisan goods sama sa jams, wine ug daghanan pa nga gama sa mga local farmers sa dakbayan.
Sumala sa Interfacing Development Interventions for Sustainability (Idis) gitugtan ang mga local organic farmers nga ibaligya ang ilang mga kaugalingon nga produkto ug makiglambigit sa “income-generating projects” arun matabangan ang mga nahisgutan nga makarekober human nga labing naapektohan sab ang panginabuhian sa mga nahisgutan gumikan sa Covid-19 pandemic.
Subay sa schedule nga gipagula sa Davao City Agri Office, ang Organic Farmers’ Market abli sa mga konsumante matag adlaw nga Huwebes ug Biyernes gikan sa alas otso sa buntag hangtud na sa alas singko sa hapon.
