DAVAO CITY – Gidagsa sa daghanan nga mga kustomer ang Roxas Night Market dungan sa subli nga pag-abli niini kagahapong adlawa.
Kahinumduman nga duruha ka tuig kini nga gipasirad-an sukad nga nagsugod ang Covid-19 tungod sa posibilidad nga mamahimong super spreader kini sa kagaw.
Apan kagabie gidagsa kini sa mga mahiligon mukaon, mamalit ug mga RTW’s ug kadtong buot nga magpamasahe.
Sama sa nauna nga plano, hugot nga gipatuman ang seguridad sa otoridad ug gipahimangnoan ang mga mosulod nga kanunay i-obserba ang Social distancing.
Nahimong lingaw sab ang pag-abli sa Night market gumikan kay adunay live band nga mi-entertain sa mga kustomer.
Una na sab nga gibutyag sa Davao City Police Office (DCPO) nga wala silay nadawat nga kamandoan ngha dili pasudlon ang mga dili bakunado inay pahimangnoan lamang ang mga musulod nga kanunay suoton ang facemask.
Kahinumduman nga usa sa mga rekisitos sa mga vendors arun nga tugtan sila nga makatinda mao ang pagpabakuna una sa mga nahisgutan o kinahanglan nga fully vaccinated na.
Hinuon nahimon hapsay ang unang adlaw gumikan kay adunay mga area sab diin gipahimutang ang mga sakop sa CTTMO arun masiguro nga hapsay ang dagan sa trapiko sa nahisgutan nga area.
