DAVAO CITY – Gipahibalo sa Public Safety and Security Command Center (PSSCC) nga aduna pa gihapoy mga sumbanan nga kinahanglan tumanon sa mga muadto sa Roxas Night Market dungan sa pag-abli niini karung adlawa.
Sumala pa kang PSSCC head Angel Sumagaysay, nga isip kabahin sa pagpatuman sa security measures, ipatuman pa gihapon ang no backpack, no jacket policy.
Gani, andam na matud pa ang seguridad ug operasyon sa Roxas Night Market karung adlawa diin anaa sa upat kini ka section nga gilangkuban sa food, ready to wear (RTW), accessories ug alang sa mga therapist.
Ipatuman sab sa otoridad ang One entrance, one exit policy sama kaniadtong wala pa nahitabo ang pandemya.
Magsugod ang operasyon sa alas singko sa hapon hangtod na sa alas 12 sa tungang kagabhi-on.
Karun pa lang nagpahimangno na si Sumagaysay ngadto sa mga vendors nga mutamod sa ipatuman nga mga polisiya.
Gikanayong kalakip sab sa ipakatag sa lugar ang mga personahe sa City Transport and Traffic Management Office (CTTMO) nga mo-assist sa dagan sa trapiko sa lugar ug pagsubay kung asa ang mga parking areas.
Samtang tahasan sab ang ahensiya sa City Environment and Natural Resources Office (CENRO) sa pagpanglimpiyo sa lugar samtang ang Civil Security Unit (CSU) maoy modumala sa crowd control.
Hugtanon nga seguridad sab ang tutukan sa mga sakop sa Davao City Police Office ingon man Task Force.
Gikanayong adunay 56 stalls ang food section, RTWs and accessories anaa sa 65 stalls, samtang ang mga therapist anaa sa 100.
