DAVAO CITY – Namatikdan na karon sa pamunoan sa Davao City Overland Transport Terminal (DCOTT) pinaagi sa ilang manager nga si Aisa Usop ang pagsaka sa ihap sa mga bus trips sukad nga gipailalom ang dakbayan sa Alert Level 1.
Sumala sa opisyal nga sa kasamtangan anaa matud pa sa halos 600 ka mga bus trips matag adlaw ang ilang matala sukad Marso 1, 2022.
Kalakip na niini ang bag-ohay pa lamang gilusad nga Davao-Marawi Friendship Route nga adunay tulo ka mga biyahe matag adlaw paingon sa Marawi ug tulo ka biyahe usab paingon dinhi sa dakbayan.
Midoble na matud pa karun ang mga biyahe kung itandi kaniadtong panahon nga nasinatian sa dakbayan ang grabe nga epekto sa pandemiya nga anaa lamang sa 200 ngadto na sa 400 ka mga biyahe matag adlaw.
Naglaum na lamang karun si Usop nga musaka pa ang ihap niini sa umaabot nga mga adlaw o semana ilabi na nga nagsingabot na sab ang paghinumdom sa semana santa sa Abril ug eleksiyon sa bulan sa Mayo.
Samtang gitino karun sa opisyal nga pabilin nila nga gipatuman nag 70 percent seating capacity arun nga ma-obserba ang protocols sa point of destination sa higayon nga ang usa ka siyudad ug municipality of destination ang wala pa gipailalom karun sa Alert Level 1.
Hugtanon sab ang ilang kamandoan ngadto sa mga driver ug pasahero sulod sa terminal nga suoton ug tarung ang facemask.
Angayan sab sumala pa nga mutamod ang mga Bus operators sa guidelines nga gipagula sa Land Transportation Franchise and Regulatory Board alang sa interzonal ug Intrazonal travels tali sa mga area nga adunay taas nga alert level classification ug area nga ilalom sa alert level 1 karung panahona.
