DAVAO CITY – Gitambongan sa gatusan nga PUV drivers ang unang adlaw sa gipahigayon nga seminar sa ahensiya sa City Transport and Traffic Management Office (CTTMO) kagahapong adlawa sa Toril Gym ning dakbayan.
Kahinumduman nga tumong sa nahisgutan nga lakang nga ma-refresh ang mga nahisgutan sa mga gipatuman nga balaud trapiko sa dakbayan ilabi na nga duruha ka tuig na sab ang milabay sukad nga nakapahigayon ang ahensiya ug seminar kini tungod sa hugtanon nga mga restrictions nga gipatuman sa dakbayan hatud sa Covid-19 pandemic.
Laraw sab sa CTTMO nga malikayan sa mga PUV drivers ang away samtang anaa sa kadalanan.
Kadaghanan sab matud pa sa mga PUV drivers ang otomatiko lang nga namasada human nga nakakuha ug lisensiya ug wala pay igong kasayuran kabalut sa mga balaud trapiko.
Sumala pa kang CTTMO head Dionesio Abude nga sunod-sunod ang ilang ipahigayon nga mga seminar diin karung adlawa, bisitahon nila ang Los Amigos Gym sa Tugbok District, Marso 9 sa Central Park Gym sa Talomo District ug Marso 10 sa Juliville Gym sa Barangay Tigatto.
Ayha sumala pa muadto sa seminar, kinahanglan nga dad-on sa mga nahisgutan ang mga gikinahanglan nga mga rekisitos sama na lamang sa lisensiya ug daghanan pa.
Nanawagan si Abude sa mga PUV drivers nga pahimuslan ang kahigayonan sa pagtambong sa seminar.
