DAVAO CITY – Gumikan sa padayon nga pag-ubos sa kaso sa Covid-19 sa dakbayan, laraw karon sa Davao City Covid-19 Task Force nga mapahimutang na ang dakbayan sa Alert Level 1 sugod sa Marso 1, 2022.
Apan luyo sa nahisgutan nga plano, gikanayon ni Dr. Michelle Schlosser, tigpamaba sa Covid-19 Task Force nga kinahanglan dili kalimtan sa mga Dabawenyos nga mo-obserba sa Minimum Public Health Standards (MPHS). Gikanayong ang pinaka-epektobo pa gihapon nga pamaagi batok sa infection mao ang MPHS.
Una na sab nga gibutyag sa Davao City Covid-19 Task Force nga nakab-ot na sa dakbayan ang positivity rate nga 5 percent nga maoy rekisitos nga basehan sa World Health Organization’s (WHO’s) alang sa pag-abli sa ekonomiya.
Naglaom ang opisyal nga pabilin nga consistent ang mga Dabawenyos sa pagka disiplinado ug padayon sa ilang kooperasyon sa mga lakang sa gobyerno labi na sa vaccination rollout ug Covid-19 management pinaagi sa pagtuman sa Prevention, Detection, Isolation, Treatment, and Reintegration (PDITR) strategies.
