DAVAO CITY – Gipasalig sa Mindanao development authority (MinDA) nga mahuman ang tanang mga big-ticket projects sa Mindanao bisan pa man ug mokanaug na sa iyang katungdanan si Pangulong Rodrigo Duterte sa Hunyo 30 ning tuig kasamtangan.
Gikanayon ni MinDA Assistant Secretary Romeo Montenegro, bisan ug mag-usab na ang administrasyon magpadayon lamang gihapon ang pagpatuman sa mga proyekto gumikan kay priority programs kini sa kagamhanan.
Pipila sa mga dagkong proyekto nga wala pa nasugdan ang katukuran sa Davao-Samal Bridge ug ang Mindanao Railway Project.
Gikatarungan ni Montenegro nga nalangan ang pagpatuman sa nahisgutang mga proyekto partikular na ang Davao – Samal bridge gumikan kay naa pa kini sa discussion stage tali sa gobyerno Pilipinas ug sa gobyerno sa China nga maoy mohatag ug loan alang sa nahisgutang proyekto.
Samtang, gilauman usab nga sugdan na ang katukuran sa Mindanao Railway Project, sa higayon nga mahapsay na ang dyutay nga suliran labot niini.
