DAVAO CITY – Napasakahan na ug kaso ang driver sa Trailer Truck nga gikanayong nakaligis sa usa ka indibidwal nga nag-motorsiklo samtang nagsubay sa Carlos P. Garcia Highway (Diversion Road) ning dakbayan.
Kahinumduman nga sa gipahigayon nga imbestigasyon sa Talomo Police station, samtang nagmaneho sa iyang motorsiklo ang biktima nga nailang si Mark Angielo Loot, 29 anyos , residente sa Ciriaco Godoy St Zone III Santa Cruz Davao Del Sur, kalit kini nga natumba gumikan sa kandalog sa dalan samtang anaa sa kurbada nga bahin sa nahisgutan nga kalsada.
Natunong sab nga kadungan niini ang trailer Truck hinungdan nga nalatayan ang biktima nga maoy hinungdan sa hinanaling kamatayon niini.
Mitahan sab dayon ngadto sa kapulisan ang driver sa trailer truck nga nailang si June Salvador, 45 anyos residente sa Barangay Tambler Gen. Santos City ug gidala sa Talomo Police Station alang sa tukma nga disposisyon.
