DAVAO CITY – Anaa na karon sa kustodiya sa Sta. Maria Municipal Police Station ang giilang Top 1 Most Wanted Municipal Level ug Top 8 Most Wanted sa Provincial Level kinsa nasikop atol sa gipahigayon nga manhunt operation sa kapulisan.
Una ng naila ang dinakpan nga si Radzmil Colipano Asnawe, 40 anyos, lalaki, minyo, mananagat ug residente sa Brgy. Tanglad, Sta. Maria, Davao Occidental.
Gisikop ang nahisgutan pinasikad sa Warrant of Arrest tungod sa kasong Frustrated Homicide ug murder nga gi-isyu ni Magnolia C. Valez-Cayetano, Presiding Judge sa 11th Judicial Region, RTC Branch 20, Digos City, Davao Del Sur nga adunay petsa nga Pebrero 2 2016.
Nasikop ang nahisgutan sa Sitio Dalamoan, Brgy Mamacao, Sta. Maria, Davao Occidental ug nagpabilin sa kustodiya sa Sta. Maria Municipal Police Station alang sa tukma nga disposisyon.
Mamahimo sumala pa nga makaduso ug piyansa ang nahisgutan sa kantidad nga P40,000 samtang walay girekomenda nga piyansa sa kasong murder. Ang pagkasikop sa nahisgutan tungod sumala pa sa hiniusang puwersa sa mga personahe sa Sta. Maria MPS ug 73rd IB.
Gipahugtan pa karon sa Sta. Maria MPS ang ilang police operations batok sa mga wanted persons ug ipadayon sab nila ang paggukod sa mga indibidwal nga nag-atubang ug kaso ug padayon karon nga nagtago-tago.
