DAVAO CITY – Gipahugtan pa karon ang monitoring ingon man pagbantay sa kapulisan sa Davao City Coastal Road human ang gikanayong insidente sa riot nga nahitabo sa nahisgutan nga dapit.
Una ng gibutyag ni Public Safety and Security Command Center (PSSCC) Head Angel Sumagaysay nga miulbo ang kagubot sa Times Beach–Roxas Avenue nga sakop sa coastal road project diin nagpadayon sab ang konstrusiyon.
Kahinumduman nga una na sab nga gika-report nga adunay nahitabong kagubot sa nahisgutan nga dapit. Samtang gibutyag ni Sumagaysay nga nakiglambigit na sila sa mga station commander human nga nakadawat na sab sila ug susama nga reklamo.
Hinuon gitino sa opisyal nga walay natigayon nga riot sa area sa Bago Aplaya–Times Beach segment sukwahi sa nauna nga report diin ang maong dapit ang kasamtangan ng gi-ablihan alang sa mga cyclists, joggers ug uban pang recreational enthusiasts.
Una na sab nga gimando ni Davao City Mayor Inday Sara Duterte-Carpio ang deployment sa coastal road monitoring team aron masiguro ang seguridad sa area aron nga dili sab maapektohan ang construction equipment nga gipahimutang sa area.
Sukad sumala pa nga gibalihan ang coastal road sa publiko kaniadtong Enero 28, nakatala ang monitoring team ug average nga 10,000 ka mga indibidwal nga misulod sa partial area sa coastal road sa milabay nga weekend.
