DAVAO CITY – Mamatikdan na karon ang dakong pag-ubos sa kaso sa Covid-19 sa dakbayan kini human nga miubos na sab karon ang Covid-19 positivity rate sa siyudad ngadto sa 19.7 percent.
Hinuon wala pa gihapon kini nagpasabot nga natapos na ang surge. Una ng gibutyag ni Dr. Michelle Schlosser, spokesperson sa Davao City Covid-19 Task Force, nga madeklara lamang nga ubos na ang kaso sa siyudad kung maangkon na ang positivity rate nga 5 porsyento paubos.
Kahinumduman nga subay sa epidemiological studies, laoman nga sa bulan sa Marso 2022 mas moubos na ang kaso sa mga natakdan sa kagaw.
Apan gitino ni Dr. Rachel Pasion, head sa Regional Epidemiology and Surveillance Unit sa Department of Health (DOH)-Davao, nga ang duration sa surge ang magdepende sa lihok sa mga tawo hinungdan nga lisud sab mabutyag kung hingpit na nga maubos ang kaso sa nahisgutan nga bulan.
Una na sab nga gibutyag ni Schlosser nga padayon nga ipatuman sa lokal nga kagamhanan ang PDITR strategy, o Prevention, Detection, Isolation, Treat, ug Reintegration, aron nga batukan ang pagkatag sa infection, ingon man ma-practice ang MPHS, mapalig-on ang isolation, swabbing, quarantine, ingon man pag-abli sa Covid-19 Cluster Clinic.
