DAVAO CITY – Nagpahimangno karon ang ahensiya sa Commission on Elections (Comelec) -11 ngadto sa mga supporters ug mga kandidato nga dili magpataka ug butang sa mga campaign materials karung panahon sa eleksiyon.
Tipik lamang kini human nga kamatikdan karon ang mga nagkatag nga mga posters sa mga kandidato sa bisan asa nga mga dapit.
Sumala pa kang Atty. Gay Enumerables, Assistant Regional Director ug spokesperson sa Comelec-11, hugtanon nga gidili ang pagbutang ug mga campaign materials sa mga poste sa kuryente, mga tulonghaan, side walks, traffic sign,
Barangay Hall, Terminal, public shrine ug daghanan pa gumikan kay dili sumala pa identified ang nahisgutan nga mga dapit isip Common poster area.
Hinuon puwede sumala pa nga magpahimutang campaign materials sa mga kandidato sa mga pribadong propedad apan kinahanglan nga mananghid o adunay consent sa nanag-iya niini.
Samtang dili pa sab sila basta-basta makapahigayon ug Oplan Baklas sa mga campaign materials sanglit kinahanglan pa sab nila nga makiglambigit niini ngadto sa uban nga mga hingtungdan nga ahensiya sa kagamhanan sama sa PNP, DILG ug DPWH.
Sa kasamtangan okupado pa ang Comelec sa ilang pagpangandam sa eleksiyon hinungdan nga gipahimangnoan na lamang niini ang mga kandidato nga mutamod sa mga sumbanan nga gipagula sa Comelec ilabi na panahon sa pagpangampanya ilabi na nga nagpabilin pa sab karon ang Covid-19 pandemic.
