DAVAO CITY – Gumikan sa kalit nga pagsaka sa kaso sa Covid-19 sa lalawigan sa Davao del Norte, partikular na Island Garden City of Samal kinahanglan na nga magdala ang mosulod sa isla ug vaccination card ingon man government isyu nga ID.
Laraw niini ang pag-regulate sa lihok sa mga tawo nga anaa gawas ug delikado nga matakdan sa kagaw samtang nagsuroy-suroy.
Sumala sa ulahing datus sa Samal Island, mikabat sumala pa karon sa 80 ang mga aktibong kaso ang nasubay sa City Health Office sa nahisgutan nga lugar.
Sa gipagula nga executive order sa lalawigan, subayon pa kung fully vaccinated ang usa ka indibidwal ayha kini tugtan nga makasulod hinungdan nga mahinungdanon ang paghupot ug vaccination card uban ang government issued ID.
Sa mga bata nga edad 12 anyos pataas, pangayuan kini sa Samal QR code hinungdan nga kinahanglan nakapa-rehistro ang mga nahisgutan.
Hinuon kadtong mga residente sa lugar, bugtong OR code na lamang ang ipakita sa higayon nga mulatas sa mga checkpoint.
Samtang sa mga turista, angayan matud pa nga magpa-booking na kini daan sa adtuan nga resort ug andamon gihapon ang gikinahanglan nga mga rekisitos.
