DAVAO CITY – Dunay pasidaan ang Bise Mayor sa Davao City nga si Sebastian Duterte ngadto sa publiko kalabot sa nagagamit sa ngalan niya ug sa uban miyembro sa pamilya Duterte alang sa solicitation o sa pag-pitch og negosyo.
Sumala niya, kung makahimamat ang mga Dabawenyo og mga tawong dunay hulagway kauban siya, si Presidente Duterte, o di kaha iyang mga igsuon nga sila Davao City Mayor Sara Duterte ug Davao City 1st District Representative Paolo Duterte, ug mangayo dayon og kwarta o di kaha maghisgot og negosyo, usa kana ka scam nga style matud pa sa mga gihulagway niyang “hampaslupa”.
Dili usab kuno pasabot nga kauban lang nila sa picture ang mangingilad, tinuod na ang ilang ginaingon. Gikapoy na sumala pa sa maong suliran ang Bise Mayor tungod makapilang higayon na kining nahitabo sa miaging tuig, ug unta nakakat-on na sab ang publiko niini.
Niadtong 2021, pipila ka higayon nga gigamit sa mga mangingilad ang ngalan sa iyang igsuong Mayora alang sa campaign funds kuno niini.
Nadakpan usab niadtong Agosto ang upat ka scammers nga nagapaluyo niini.
