DAVAO CITY – Subling nagpahimangno ang Department of Tourism XI ngadto sa Multiple-Use Hotels sa rehiyon nga mutuman sa mga protocol nga gipakanaog sa Bureau of Quarantine taliwala sa mga nahitabong insidente sa quarantine skipping sa Metro Manila.
Sumala ni DOT XI Regional Director Tanya Rabat-Tan nga ang mga makasupak niini ang pahamtangan og suspension sa ilang accreditation ug revocation sa ilang permit isip MUH, gawas pa sa mga silot subay sa ilang Tourism Regulation, Coordination, ug Resource Generation.
Kinahanglan usab nga i-monitor sa maong mga pasilidad ang ilang quarantine ug leisure guests kung nagatuman ba sila sa mga health protocol.
Ug galing makalapas sa maong protocols ang ilang mga guest, kinahanglan nila kining i-report dayon sa BOQ alang sa hinanaling imbestigasyon.
Nagapadayon ang pag-orient sa DOT XI One Stop Shop ngadto sa mga Returning Overseas Filipino kalabot sa health and safety protocols ug quarantine guidelines pag-abot nila sa Davao.
Nakigkoordinar na sab ang buhatan ngadto sa uban pang mga hingtungdang ahensya kalabot sa ubang pang concerns sa MUH ug ROFs.
