DAVAO CITY – Kampante ang lokal nga kagamhanan nga sa dili madugay maangkon na sa dakbayan ang herd immunity o igong proteksiyon aron batukan ang kagaw nga dala sa covid-19.
Una ng gibutyag ni Dr. Michelle Schlosser, tigpamaba sa COVID-19 Task Force sa siyudad nga pipila na lamang karon ang gikinahanglan aron nga makab-ot sa siyudad ang kapin usa ka milyon nga mga fully vaccinated nga mga indibidwal.
Tipik lamang kini human nga nakatala na ang dakbayan ug 87 percent o 1,136,577 ka mga indibidwal nga nakaangkon ug first dose sa COVID-19 vaccine, subay sa Disyembre 1 nila nga datus.
Kahinumduman nga anaa na karon sa 75 percent o 967,053 ka mga indibidwal ang naka-kumpleto na sa ilang bakuna.
Apan gitino ni Schlosser nga dili lamang 70 percent sa target population ang buot nga maangkon sa siyudad kung dili anaa sa 100 percent.
Subay sa 2020 gikan sa National Economic and Development Authority (NEDA), ang dakbayan adunay populasyon nga 1,825,450.
