DAVAO CITY – Gibarugan sa medical chief sa Southern Philippines Medical Center nga si Dr. Ricardo Audan nga dili ang election season ang hinungdan sa pag-ubos sa COVID-19 cases sa Dakbayan sa Davao ug sa pag-ubos usab sa ihap sa mga ma-admit nga COVID patients sa nasangpit nga balay-tambalanan.
Sumala sa opisyal nga ang halapad nga coverage ug paggamit sa mga nagkadaiyang vaccine brands sa COVID-19 vaccination rollout ang hinungdan nganong padayong naga-ubos ang mga matalang kaso sa Dakbayan.
Daghan na usab ang nagatuo sa kaepektibo sa bakuna karon kung itandi sa mga milabayng bulan nga daghan pa ang nangahadlok tungod sa mga gituohang di maayong epekto niini sa panglawas.
Dugang pa sa opisyal nga makatabang gayod ang bakuna aron dili makasinati og grabeng kahimtang ang usa ka tawo ug galing matapdan kini sa maong sakit.
Kamatikdan nga kasagaran sa mga anti-vaccine nga anaa sa social media, nagapamugos nga ginapolitika lang sa lokal nga kagamhanan ang COVID-19 sanglit init nga hisgutanan karon sa nasudnong politika ang ngalan ni Davao City Mayor Sara Duterte.
Nagatuo sila nga gamiton kuno sa Mayora ang COVID-19 situation aron gamiton sa iyang pagpangampanya sa piniliay sunod tuig.
