DAVAO CITY – Gitambagan ni Sonia Delfin, Senior Labor and Employment officer sa DOLE-11 ang mga trabahante nga gi-require nga magpabakuna sa ilang kompanya nga mamahimong moreklamo sa ilang buhatan.
Gitino sa opisyal nga ang pagpabakuna dili mandato sa mga empleyado ug kinahanglan nga tugutan pa gihapon kini sa mga employer nga makatrabaho.
Gitataw sab ni Delfin nga pabilin pa karon nga epektibo ang Labor advisory number 3 series of 2021 nga hugtanong nagdili sa pagpatuman sa “No Vaccine, No Work policy” sa mga kompanya.
Gitino sab sa DOLE nga mamahimo lamang nga awhagon sa mga kompanya ang ilang empleyado nga magpabakuna apan dili mamahimo nga pugson.
Kahinumduman nga gisugyot ang pagpabakuna sa mga empleyado nga sakop sa 3Cs o Closed, Crowded ug Close contact places sama na lamang sa mga restaurant, gym, spa ug daghanan pa.
Kung aduna sumala pay kabag-ohan sa guidelines, gihulat pa kini sa kasamtangan sa DOLE gikan sa ilang Central office sa kaulohan.
