DAVAO CITY – Gikasubo pag-ayo sa regional office sa Land Transportation Franchising and Regulatory Board (LTFRB 11) ang ilang pagsuspende sa “Libreng Sakay” service alang sa mga health care workers ug authorized persons outside of residence (APOR) sanglit nagkaproblema na ang pondo nga igahin alang niini.
Una ng gibutyag ni Nonito Llanos III, regional director sa LTFRB, nga hurot na ang budget alang niini hinungdan nga gihunong na ang libreng sakay sukad sa milabay nga adlaw.
Sa kasamtangan, padayon pa nga mihangyo ang buhatan ug dugang nga pundo sa ilang central office ug kung maaprubahan kini, gilayon sab dayon nila nga ibalik ang nahisgutan nga serbisyo.
Una ng gi-ablihan sa LTFRB 11 ang ika-24th route sa “Libreng Sakay” Phase 2 nga nagsubay sa dakbayan sa Davao paingon sa Davao Occidental.
Una ng nagpadayag sa ilang pagpasalamat ang mga medical frontliners gumikan kay dili na sila malisdan nga moadto sa ilang trabaho ilabi na kadtong nanimuyo sa mga lagyong lugar.
