DAVAO CITY – Isip lakang aron awhagon si Davao City Mayor Sara Duterte nga mudagan isip Presidente sunod tuig, nagpa-opaw ang mga Barangay Kapitan, Kagawad, ug mga staff sa Davao City LGU kagahapong adlawa.
Gitawag nila kining Unity Kalbo Para sa Pagbabago, File Sara File. Gipaluyuhan ni ABC President Baranga Kapitan Edgar Ibuyan, Sr. ang nasangpit nga programa.
Gikanayon ni Ibuyan nga susama gihapon niadtong 2015 ang pamaagi nila sa pag-awhag sa Mayora nga mudagan sa pinakataas nga katungdanan.
Sumala sa Barangay 7-A SK Chair nga si Judy Ann Gorgonio, buot niyang awhagon si Mayor Sara nga mudagan pagka-Presidente aron mamahimong malinawon ang Pilipinas sama sa kahimtang sa Dakbayan.
Ang pagpa-opaw sa mga tagasuporta sa mga Duterte, nahitabo usab niadtong tuig 2015, kanus-a giawhag nila si kanhi Mayor ug karon Presidente Rodrigo Duterte, kinsa kapila ka higayon usab nga nagdumili sa pagdagan, nga mupapili isip Presidente sa nasud.
Gani, nagpa-opaw usab ang Mayora kaniadto isip suporta sa mga nagapanawagan sa iyang amahan.
