DAVAO CITY – Ginalantaw karon sa kapulisan ang anggulong bangi sa yuta kalabot sa pagpusil-patay kang Barangay Datu Salumay Captain Amado Mandamo Mansabid.
Si Mansabid, gipatay sa wala pa mailhing suspetsado niadtong Sabado samtang natulog sa iyang sari-sari store.
Gani, ang suspek nagpabuto pa og baril sa gym ug nanghulga pa sa mga tawo ayha nisibat. Sumala ni Police Captain Philip Dave Uddin sa pakighinabi sa Bombo Radyo Davao kaniya, gibutyag niini nga chairman sa Council of Elders sa Matigsalug Tribe si Mansabid, kinsa nagagunit ug nagahusay sa mga kaso sa land conflict.
Subay usab sa ilang imbestigasyon, daghang tawo ang nangasuko kaniya tungod sa paggunit niini sa land disputes sa ilang dapit, ilabi na nga ubay-ubay ka mga yuta ang dunay multiple claims, ug ang mga nasangpit nga mga kayutaan, kabahin sa ancestral domain kon yutang kabilin sa tribong Matigsalug.
Apan, gibutyag sa asawa sa biktima nga wala silay nadawat nga pagpanghulga sa kinabuhi. Palawmon usab sa Marilog Police Station ang imbestigasyon, karong aduna na silay ginasubay nga mga person of interest sa nasangpit nga krimen
