DAVAO CITY – Magpadayon na ang Bakuna Nights, nga unang gi-pilot test niadtong milabayng semana.
Kini ang gideklara karon sa Davao City LGU.
Abli matag gabii ang San Roque Elementary School sa Barrio Obrero ning Dakbayan alang sa Bakuna Nights.
Alas 5 sa hapon hangtod alas 7:30 sa gabii ang regular nga schedule sa nighttime vaccination program sa Dakbayan.
Gawas sa mga adunay missed 2nd Dose sa COVID-19 vaccine, nagadawat usab sila og walk-in clients alang sa 1st Dose. Busa, ilang gipahimangnuan kadtong mga mag-walk in nga dal-on ang ilang SafeDavaoQR code, valid ID, ug kaugalingong ballpen.
Kinahanglan usab dal-on sa mga dunay missed dose ang ilang vaccination card. Sa ulahing ihap sa Vaccination Cluster, 1,103 ka mga indibidwal ang nakabenepisyo sa unang tulo ka gabii sa Bakuna Nights.
Gimugna ang nighttime vaccination program sa Dakbayan alang sa mga indibidwal nga walay higayon sa adlaw nga makaadto sa vaccination centers, ug alang usab sa mga night-shifter nga bali ang body clock, diin sila kasagarang tulog sa adlaw, ug mata inig gabii bisan pa man sa ilang day-off.
