DAVAO CITY – Na-inagurahan na ang labing unang Earthquake and Tsunami Monitoring Center sa Philippine Institute of Volcanology and Seismology kon PHIVOLCS sa Mindanao, nga nahimutang sa Southern Mindanao Campus sa Philippine Science High School sa Barangay Mintal ning Dakbayan sa Davao.
Ang maong monitoring center, makatabang sa pagpakusog sa earthquake detection capability sa nasud, diin mahinungdanon nga masusi ang gagmayng pagtay-og sanglit posible kining musangko sa major earthquake events nga makapahulga sa kinabuhi sa mga tawo ug makaguba og mga kabtangan, sumala ni PHIVOLCS Director Renato Solidum.
Magamit usab ang pasilidad isip back-up sa higayong magkaproblema ang PHIVOLCS Data Receiving Center sa main office niini sa Quezon City.
Gikanayon usab ni Solidum nga angay lang magtukod og uban pang earthquake detection facilities sa ubang dapit sa nasud aron mapasalig ang padayong pagserbisyo sa buhatan, ilabi na sa panahon sa mga katalagman.
Matud ni Department of Science and Technology kon DOST Secretary Fortunato de la Peña, mas paspas ug dali na lamang nga mapaagi ang impormasyon kalabot sa mga linog ug tsunami gumikan sa pagkatukod sa nasangpit nga pasilidan.
