DAVAO CITY – Nakatakdang maglusad og Bakuna Nights ang Dakbayan sa Davao, sumala ni Mayor Inday Sara Duterte-Carpio. Ang maong estratehiya, usa sa mga dugang pamaagi sa lokal nga panggamhanan aron mapapaspas ang vaccination rollout sa Dakbayan alang sa tinguhang herd immunity, nga makab-ot inig mukabat na sa 1.2 million ka indibidwal ang nabakunahan na batok COVID-19.
Gikanayon sa Mayora nga duna nay duha ka vaccination sites ang ginasusi karon sa Davao City LGU, nga mamahimong pahigayunan sa vaccination sa kagabion.
Ang pagpahigayon usab sa Bakuna Nights, makatabang alang sa mga nanarbaho sa night shift sama sa security personnel, fast-food chain workers, business process outsourcing kon BPO employees, food delivery drivers, ug uban pa.
Sa pikas bahin, anaa na sa second phase sa pilot testing sa digital vaccination certificate sa nasud nga VaxCertPH, ug apil sa mga LGU nga mupailalom niini ang Dakbayan sa Davao.
Sukad kagahapon usab, ma-access na sa mga Dabawenyo ang maong self-service portal pinaagi sa laptop, desktop computer, ug smartphone. Mamahimo usab nga ma-download, ma-screenshot, ug ma-print ang vaccination certificate.
Gikanayon sa Mayora nga nakig-alayon ang City Information Technology Center kon CITC sa Department of Information and Communications Technology alang sa pag-implementar niini.
