DAVAO CITY – Karong adlaw magsugod ang School Year 2021-2022. Gumikan kay dili pa aprubado ang gidusong pagbalik sa face-to-face classes, magpabilin gihapon nga online ug modular kon blended learning ang mode of teaching sa bag-ong akademikong tuig.
Nagpasalig ang Department of Education nga mas gipaayo pa nila ang implementasyon sa blended learning, luyo sa mga daghanang isyu nga nasinatian sa mga magtutudlo ug magtutungha sa milabayng school year sama na lang sa mga sayop nga modules, nga nag-viral pa sa social media.
Sumala ni DepEd XI Spokesperson Jenielito “Dodong” Atillo kaniadto sa paghuman sa school year 2020-2021, daghan sila og nakat-onan sa pagpatuman sa blended learning ubos sa COVID-19 restrictions.
Nagpasalig siya kaniadto nga ilang palig-onon ang quality control sa mga module ug ila dayong imbestigahan ang mga sayop nga module sanglit adunay pipila ka mga kaso niini nga mugna-mugna lang sa mga netizen aron mag-viral sa social media.
Ila usab pakusgon pa ang online teaching strategies aron mas daghan pa og makat-onan ang mga magtutungha, bisan pa man anaa sila sa sulod sa ilang tagsa-tagsang panimalay.
Karon adlawa usab, mudawat pa ang mga pangpublikong tulunghaan og mga enrolees alang sa kasamtangang school year.
