DAVAO CITY – Anaa na sa kapin kon kulang 14 thousand ka mga Dabawenyo ang nabakunahan na batok COVID-19 pinaagi sa mobile vaccination program nga gipasiugda sa Sangguniang Panlungsod sa Dakbayan sa Davao.
Sukad sa pagsugod niini niadtong bulan sa Agosto hangtod sa milabayng Sabado, Setyembre 4, miabot na sa 14,350 ang naserbisyuhan sa maong programa subay sa datos gikan kang Commitee on Health Chair Councilor Mary Joselle Villafuerte.
Niadtong Sabado lang, 500 ang nakadawat na og first dose sa Sinopharm vaccine sa Barangay San Isidro sa Bunawan District.
Sa ulahing datos, anaa sa 1,650 ang nabakunahan sa mobile vaccination sa 1st District, 3,633 ka mga indibidwal ang naserbisyuhan sa 2nd District, samtang 9,067 usab ang nabakunahan sa 3rd District.
Magpadayon usab ang mobile vaccination program sa Konseho sa mga mulabay pang adlaw.
Kahinumduman nga mihangyo si Davao City Mayor Inday Sara Duterte-Carpio ngadto sa mga konsehal nga magpahigayon og mobile vaccination programs sa ilang mga distrito aron mabakunahan ang mga nanimuyo sa hilit nga mga dapit sa Dakbayan, ug aron usab mapapaspasan ang pagkab-ot sa 1.2 milion vaccinated individuals alang sa herd immunity.
Target kining makab-ot sa Dakbayan sa dili pa mahuman ang kasamtangang tuig.
